Библиотека нового поколения IT — ТАЛ

Муус устар 18 күнүгэр Төлөйдөөҕү «i-тал» саҥа көлүөнэ библиотекатыгар Амма улууһун центральнай библиотекатын методистара, Чапчылҕан, Абаҕа, Болугур, Чакыр, Соморсун, Эмис, Сэргэ бэс, Наахара, Покровка, Сулҕаччы, Сатаҕай нэһилиэктэрин библиотекарьдара кылаабынай методист Юлия Максимовна салайааччылаах кэлэн ыалдьыттаан бардылар. 

Ыалдьыттары баһылык Игорь Владимирович Николаев салалталаах нэһилиэк дьаһалтатын улэһиттэрэ салаамааттаах алаадьынан айах тутан көрүстүлэр. Төлөй нэһилиэгин олоҕун-дьаһаҕын, «Аартык» норуот айымньытын дьиэтин үлэтин, түмсүүлэр, түөлбэлэр үлэлэрин туһунан аҕа баһылык экскурсия кэмигэр сиһилии сырдатта. Салҕыы ыалдьыттарга библиотека ис бараанын, ыытыллар улэлэри, тэрээһиннэри библиотекарьдар Изабелла Степановна Кузьмина уонна Христина Степановна Семенова кэпсээтилэр. Ыалдьыттар Наталья Егоровна Гуляева салайааччылаах, туой куруһуога буола турарын көрөн сэргээтилэр. 

Эбиэт кэннэ Төлөйдөөҕү библиотека бэйэтин уопутун, сүрүннээн «Библиотека нового поколения» Федеральнай граны хайдах ылары ситиспитин, «Кэм кэрдииьинньигэ» интерактивнай летопись хайдах оҥоһуллубутун туһунан уллэһиннэ. Амматааҕы коллегалар нэһилиэктэринэн бэйэлэрэ ыытар улэлэрин, ситиһиилэрин кэпсээтилэр.

Түмүккэ, ыалдьыттар Амма улууһугар тахсыбыт саҥа кинигэлэрин бэлэх ууннулар, махтал тылын эттилэр. Амма улууһун дьонугар-сэргэтигэр Төлөй историятын сэһэргиир сыалтан нэһилиэктэрин библиотекаларыгар «Төлөйтөн төрүттээхпит» кинигэ бэлэх быһыытынан туттарылынна. 

Маннык, атын улуустартан кэлэн, Төлөйбүт нэһилиэгин үлэтин холобур оҥостон, уопут атастаһан баралларыттан биһиэхэ, үлэлиир дьоҥҥо, күүс-сэниэ, кыах биэрэрэ саарбаҕа суох.