Библиотека нового поколения АЙ — ТАЛ

Өрөспүүбүлүкэтээҕи «Кинигэ күүһэ» ( #Сила книги ) аахсыйа Саха сиригэр сыл ахсын ыытыллар. Бу аахсыйаҕа кинигэ туһатын кэпсииллэр, оҕолорго уус-ураннаан ааҕан иһитиннэриллэр. Төрөөбүт тылынан ааҕыы оҕолорго сахалыы толкуйдуур дьоҕурдарын сайыннарар, төрүт тылларын байытар. Аахсыйаҕа 11 эбээ, 10 оскуола оҕото кытынна.

Бүгүн Төлөй нэһилиэгин эбээлэрэ «Эбээ оскуолата» куруһуок кыттыылаахтара Сандалы остуолу тардан, сахалыы төрүт аспытын астаан (кус этэ, миинэ ,саламаат, алаадьы,баахыла,лэппиэскэ,быырпах, сүөгэй уо.д.а.) ,Төлөйдөөҕү С. Т. Захаров аатынан оскуола интернатын оҕолорун аһатан күндүлээтилэр. Саҕаланыытыгар оҕолор эбээлэргэ анаан эҕэрдэ хоһооннорун аахтылар, сыанка көрдөрдүлэр. Оҕолорго сайыны көрсөр Ньукуолун күнүн сиэрин-туомун туһунан кэпсээтибит, араас оонньуулары оонньоттубут, ыйытыктаах биктэриинэни ыыттыбыт. Аһыыр кэмҥэ оҕо сахалыы саҥарарын, ааҕарын сыаллаах , «Эбээ оскуолата» куруһуок салайааччыта Марфа Дмитриевна Седалищева оҕолорго умсугутуулаахтык уонна кэрэхсэбиллээхтик кинигэ ааҕан иһитиннэрдэ. Эбээлэр сахалыы ас ааттарын, доруобуйаҕа туһатын кэпсээтилэр, үөрэттилэр. Төлөйбүт нэһилиэгин эбээлэригэр чэгиэн доруобуйаны, уһун дьоллоох олоҕу!