Библиотека нового поколения IT — ТАЛ

От ыйын 8 күнэ — Арассыыйаҕа дьиэ кэргэн, таптал уонна бэриниилээх буолуу күнэ. Сырдык, кэрэ бэлиэ күн  2008 сылтан  бэлиэтэнэр.  Киһиэхэ саамай күндү баайа — дьиэ кэргэнэ. Хас биирдии киһи сиргэ төрөөн ийэ-аҕа уостубат  тапталын билэн,  алаһа дьиэ тэринэн,  төрүүр оҕону төлкөлөөн,  удьуору тэнитэн,  сирдээҕи  дьолу билэбит.

Дьиэ кэргэни уонна оҕо аймаҕы өйүүр үгэһи өрөспүүбүлүкэбит бастакы бэрэсидьиэнэ Михаил Ефимович Николаев номнуо 90-с сылларга олохтообута. Дойду президенэ Владимир Владимирович Путин 2024 сылы Россияҕа Дьиэ кэргэн сылынан биллэрбитэ. Элбэх оҕолоох дьиэ кэргэн уопсастыба саҥа нуорматынан, сыаннаһынан уонна сыалынан буолуохтаах.

Төлөй олохтоохторун барыгытын бырааһынньыгынан эҕэрдэлиибит! Дьиэ кэргэн диэн киһиэхэ туохтааҕар да күндү. Оттон дьиэ кэргэн бигэ тирэҕэ – таптал уонна бэриниилээх буолуу. Дьоллоох буолар туһугар бу иэйиилэргитин харыстааҥ. Эһиэхэ чэгиэн-чэбдик доруобуйаны, дьиэ кэргэҥҥитигэр дьолу-соргуну, өйдөһүүнү, этэҥҥэ буолууну уонна туруоруммут сыалгыт туоларыгар баҕарабыт! Алаһа дьиэҕит куруутун сылааһынан угуттаатын, тапталынан, оҕо күлүүтүнэн туоллун. Оҕолоргут, сиэннэргит саҕалаабыт дьыалаҕытын салҕаан, саҥа кыайыыларынан үөрдэ турдуннар!